Artistë të rinj nga Shqipëria dhe Kosova janë bërë pjesë e ekspozitës “Europa ime” me punimet e tyre në mediumet e pikturës, fotografisë, dizajnit grafik, posterit, pikturës digjitale dhe skulpturës. Ekspozita “Europa ime” me kurator Elton Koritarin, që u hap këto ditë në Tiranë organizohet nga “EU Policy Hub” në Shqipëri dhe Instituti SINK në Kosovë me mbështetjen e Kongresit Rinor Kombëtar dhe Bashkisë Tiranë në kuadër të Tirana Kryeqyteti Europian i Rinisë 2022. Ekspozita “Europa ime” përmbyll një projekt një vjeçar, që nxit diskutimin mbi Europën përmes artit.
Projekti “Arti afron Europën më pranë të rinjve” synon angazhimin e artistëve të artit vizual në Shqipëri dhe në Kosovë, nxit krijimtarinë artistike të të rinjve me muzë Europën, kontribuon në ligjërimin publik mbi integrimin dhe identitetin europian të shqiptarëve. Ekspozita është platformë e shpërfaqjes publike mbi Europën, mbi ngjyrimet e identitetit europian dhe perëndimor të shqiptarëve, duke ndikuar në një kuptim më realist mbi botëkuptimin e artistëve të rinj nga Shqipëria dhe Kosova për kontinentin dhe institucionin Europë. Ekspozita e përbashkët “Europa ime” u çel në ambientet e “Europa House”.
Pas një selektimi në dy vende Shqipëri dhe Kosovë ekipi organizator i kësaj ekspozite përzgjodhi 20 artistë, të cilët me punimet e tyre në mediume te ndryshme të artit vizual shpërfaqin konceptet e tyre se sa afër apo larg e ndjejnë ata Europën. Pjesëmarrës në këtë ekspozitë janë Erblina Dalipi, Albi Yzo, Desara Ndoci, Elona Sylyku, Ened Kuka, Era Bajo, Erisa Breznica, Albina Fetahu, Kristi Simo, Dhurata Begolli, Gresa Gashi, Gention Qeli, Qëndresa Krasniqi, Rudina Rashiti, Bajram Llapashtica, Learta Ibraj, Klimt Dinollari, Erleta Loshaj, Klejda Gjata, Megi Ajdini.
