Prezantim libri “E ardhmja” me Mikaela Minga dhe Nebi Bardhoshi

Jeni të ftuar në mjediset e shtëpisë botuese ‘Berk’ për prezantimin e librit ‘E Ardhmja’ nga Marc Augé, përkthyer nga Mikalea Minga, një vepër e rëndësishme për të gjithë ata që shqyrtojnë zhvillimet shoqërore në kontekstin e shndërrimeve të sotme globale. Përmes një qasjeje antropologjike të thelluar, Augé analizon mënyrën se si ndryshimet e vrullshme teknologjike, globalizimi dhe pasiguria ekonomike kanë thyer konceptin tradicional të së ardhmes. Ai na vë përballë një vizioni ku e ardhmja, larg premtimit optimist të progresit, shfaqet shpesh si një horizont i paqartë dhe shqetësues.

Në këtë diskutim, Mikaela Minga dhe Nebi Bardhoshi do të shqyrtojnë relevancën e këtij teksti në përballjen me sfidat komplekse bashkëkohore si pabarazia sociale dhe transformimet dixhitale, duke na nxitur të rimendojmë të ardhmen jo vetëm si një hapësirë mundësish, por edhe si një fushë veprimi të përgjegjshëm dhe krijues.

Ky takim paraqet një mundësi të veçantë për të diskutuar ide që angazhojnë jo vetëm botën studimore, por edhe të gjithë ata që reflektojnë mbi të ardhmen e përbashkët në kohë të pasigurta.